Wednesday, July 4, 2018

மீண்டும் செயல்பாட்டுக்கு வருமா #ஸ்டெர்லைட்_ஆலை? பசுமைத் தீர்ப்பாயத்தில் இன்று விசாரணை!



தூத்துக்குடியில் இயங்கி வந்த ஸ்டெர்லைட் தாமிர ஆலையை தமிழக அரசு நிரந்தரமாக மூட உத்தரவிட்டதை எதிர்த்து, வேதாந்தா குழுமத்தின் சார்பில் தாக்கல் செய்யப்பட்ட மனு இன்று தேசிய பசுமைத் தீர்ப்பாயத்தில் விசாரணைக்கு வருகிறது.

தூத்துக்குடியில் செயல்பட்டு வந்த வேதாந்தா குழுமத்துக்கு சொந்தமான ஸ்டெர்லைட் தாமிர உருக்காலையால் சுற்றுச்சூழல் சீர்கேடு ஏற்படுகிறது, மக்களின் உடல்நலத்துக்குப் பிரச்சினை ஏற்படுகிறது எனக் கூறி அப்பகுதி மக்கள் போராட்டம் நடத்தினார்கள். அந்த ஆலையை நிரந்தரமாக மூடக்கோரி 100 நாட்களாகப் போராட்டம் நடத்தினர்.



இறுதியில் 100-வது நாளில் மாவட்ட ஆட்சியரிடம் மனு கொடுக்கச் சென்றபோது போலீஸாருக்கும், மக்களுக்கும் மோதல் வெடித்தது. இந்தக் கலவரத்தில் போலீஸார் நடத்திய துப்பாக்கிச் சூட்டில் 13 பேர் பலியானார்கள். இந்தச் சம்பவம் நாடு முழுவதும் பரபரப்பானதையடுத்து, ஸ்டெர்லைட் ஆலையை நிரந்தரமாக மூடத் தமிழக அரசு அரசாணை பிறப்பித்தது. அந்த ஆலைக்கு வழங்கப்பட்ட மின் இணைப்பையும் துண்டித்தனர்.

தமிழக அரசு பிறப்பித்த அரசாணையில் தமிழக மாசு கட்டுப்பாட்டு வாரியத்தின் விதிமுறைகள் முழுவதுமாக மீறப்பட்டுள்ளதால், ஸ்டெர்லைட் தாமிர ஆலைக்கு அனுமதி அளிக்க முடியாது எனத் தெரிவித்திருந்தது.

மேலும், ஆலையைத் திறக்கக் கோரி மாசு கட்டுப்பாட்டு வாரியத்திடம் ஸ்டெர்லைட் ஆலை நிர்வாகம் சார்பில் தாக்கல் செய்யப்பட்ட மனுவை மாசு கட்டுப்பாட்டு வாரியம் நிராகரித்தது. விதிமுறைகள் எதையும் பின்பற்றவில்லை என்ற அடிப்படையில் கடந்த மே மாதம் 28-ம் தேதி நிரந்தரமாக மூட அரசாணை பிறப்பிக்கப்பட்டது.

இந்நிலையில், ஸ்டெர்லைட் தாமிர உருக்காலையை நிரந்தரமாக மூட தமிழக அரசு பிறப்பித்த உத்தரவுக்கு எதிராகவும், ஆலையை மீண்டும் இயக்க அனுமதி கோரியும், தண்ணீர் சட்டம் பிரிவு 18(1)(பி) பிரிவின் கீழ் கடந்த 28-ம் தேதி பிறப்பித்த உத்தரவை ரத்து செய்யக்கோரியும், தேசிய பசுமைத் தீர்ப்பாயத்தில் ஸ்டெர்லைட் ஆலை நிர்வாகம் சார்பில் மனுத்தாக்கல் செய்யப்பட்டது.

அந்த மனுவில், ’’ஸ்டெர்லைட் ஆலையை மீண்டும் இயக்குவதற்கு அனுமதிக்கக் கோரியும், அங்கீகாரத்தை புதுப்பிக்கக் கோரியும் தாங்கள் தாக்கல் செய்த மனுவை அடுத்த ஒரு மாதத்துக்குள் பரிசீலனை செய்து, அடுத்த 5 ஆண்டுகளுக்கு இயக்க அனுமதிக்கக் கோரியும் மாநில மாசு கட்டுப்பாட்டு வாரியத்துக்கு உத்தரவிடவேண்டும்.

மேலும், ஆலையை இயக்குவதற்குத் தேவையான மின் இணைப்பு வழங்கவும் உத்தரவிட வேண்டும். ஆலைக்குள் ஏராளமான வேதிப்பொருட்கள் இருப்பதால், விபத்து நேராமல் தடுக்கும் நோக்கில், தண்ணீரையும், வேலையாட்களையும் பயன்படுத்திக்கொள்ள மின்சாரம் மிகவும் அவசியம்.

ஆலையை திடீரென மூடிவிட்டதால், ஆலைக்கும், இயந்திரங்களுக்கும் பல்வேறுவிதமான மிரட்டல்கள் வருகின்றன. ஏராளமான தொழிலாளர்களும், ஊழியர்களும் நேரடியாகவும், மறைமுகமாகவும் வேலையிழந்துள்ளனர்’’ என்று தெரிவிக்கப்பட்டுள்ளது.

இந்த மனு நாளை இடைக்கால நீதிபதி ஜாவத் ரஹிம் தலைமையிலான அமர்வு முன் விசாரணைக்கு வருகிறது. இந்த அமர்வில் 2 சுற்றுச்சூழல் நிபுணர்களும் இடம் பெற்றுள்ளனர்.

இந்த நிலையில் ஸ்டெர்லைட் ஆலையை மீண்டும் செயல்பாட்டுக்கு கொண்டுவர வேண்டும் எனவும், ஆலை மூடப்பட்டதால் தங்கள் வாழ்வாதாரம் பாதிக்கப்பட்டுள்ளதாக தூத்துக்குடி சுற்றுவட்டார பகுதி மக்களும் , ஆலை ஊழியர்களும் நேற்று முதல் போராட்டங்களைத் துவக்கியுள்ளனர்..
Share:

Labels

Blog Archive

Unordered List

Definition List